Le lendemain, grant compaignie
De l'ost des Françoys à Monceaulx
S'en vinrent faire ung assaillie,
Jusqu'au marché des Pourceaulx.
Soubz la montaigne s'embuchèrent,
Pour illec estre à couvert,
Et, delà, gaigner s'en allèrent
D'assault un petit bollewert.
D'un côté et d'autres canons
Et couleuvrines si ruaient,
Et ne voyait-on qu'empanons
De flèches, qui en l'air tiraient.
Adoncques Jehanne la Pucelle
Se mist dans l'arrière fossé,
Où fist de besongner merveille,
D'un courage en ardeur dressé.
Ung vireton que l'on tira
La vint en la jambe assener,
Et si point n'en desempara,
Ne s'en voult oncques tourner.
